عرق التربيانكو
🍖 عرق التربيانكو (اللحمة الباردة)
⭕ كلمتكم في البوست اللي فات عن عرق التربيانكو ومكانه بيبقى فين بالظبط .. وهو عامه العضله الخلفيه للعجل وبيكون شكله اسطواني ولحمه ناشف لانها عضله متحركه .. ووزن العرق بيبقى حوالي ٢ او ٣ كيلو
👌تعالو نشوف هنعمله ازاي 😋👌
📌 هنجهز العرق عن طريق اننا هنلفه بدوباره بالطريقه اللي في الصوره وننشفه من السوائل كويس بمناديل ورق وبعدين نعمل فيه ثقوب عميقة ببوز سكينة رفيعة من كل حته وده لاننا هانحشيها فلفل اسود حصى وتوم صحيح وتكون الفصوص حجمها متوسط مش كبيرة
📌 بعد اما نحشية توم وفلفل اسود بالكامل ومن كل الجهات هندعكة بملح عليه شوية زيت عاشن يخللي الملح يمسك فيةاللحم وميقعش من عليه
📌 في صينيه بقى او حاجه على اد العرق هننزل فيها بشويه سمنه على زيت ونشوح العرق حلو اوي من كل الجهات .. عشان انا عايزه يتشمع تماما من بره عشان المسام بتاعته تتقفل ويحتفظ بالسوايل والعصاره اللي فيه
📌 وبعد اما نشوحه هننزل عليه فى نفس الصينية ببصلة كبيره متقطعه اربع تربع وجزر متقطع مكعبات كبيرة ونضيف عليهم كوب ماء ونغطيه بورقة زبده وفوقها فويل ونقفله باحكام
📌وعلى الفرن وتكون درجه حرارته عاليه 200 مثلا هياخد حوالى ساعه ونص لساعتين على حسب وزنه يعنى لو وزنه اتنين كيلو يبقى ساعه ونص ولو وزنه تلاته كيلو يبقى ساعتين اهم حاجه نخليه مقفول محكم عشان هيستوى بالبخار اللي طالع من المياه 👍 وفى اخر نص ساعه برفع الفويل عشان وشه ياخد لون دهبي
⭕ طيب بنعرف منين انه استوى تمام بجيب خلة اسنان واغرزها فيه لو طلع السائل من الثقب ده لونه احمر يبقى لسه ما استواش انما لو السائل طلع شفاف شبه الشوربه يبقى كده تمام استوى نخرجه من الفرن ونسيبه يبرد تماما ويستحسن يدخل التلاجه عشان يبرد ويمسك نفسه
🔪 نفك الدوباره بقى من عليه ونقطعه شرايح رفيعه وبيتعمل بيه احلى سندويتشات
👌الصوص اللي نزل منه بقى مع شرايح الخضار هنصفيه كويس اوي وننزل عليه بشويه كريمه طبخ ومعلقتين دقيق ونقلبه على نار هاديه لحد ما يتقل ويبقى زي صوص الباشاميل هنظيط الملح مع رشة بهارات لحمة ورشة قرفة وكده يبقى الصوص بتاعنا جاهز وبيتاكل طبعا مع شرايح اللحم وبالف هنا عليكم
🔴 لو العرق كبير ممكن تقطوا نصه ونلفوه في استريتش راب وتحفظوه في الفريزر لحين الحاجه
جربوه وان شاء الله هيعجبكم اوي 😋😋👌👌
اللهم صل وسلم وبارك على سيدنا محمد وعلى اله وصحبه اجمعين
#العيد2024 #اللحمه_البارده #التربيانكو #اكله_سريعه #اسلام_يسري #islam_yosry #عرق_التربيانكو
تعليقات
إرسال تعليق